Friday, April 22, 2005

انا جاي يا حمكشة

استقيل من بؤس الادارة المصرية
صدقت يا حمكشة
فعلا بؤس و تخبط و عقد نفسية و كلاكيع
انا دلوقتي باكتب الحيثيات يا حمكشة
انا راجع خلاص
هافك الحبل اللي في رقبتي
هتفضل الساقية واقفة لحد ما يلاقوا تور تاني
هاسمع الصبح فيروز
و الضهر مارسيل
و ساعة العصر اسمع وجيه عزيز
و قبل مانزل الكون كله بيدور
ولما ارجع شوية بلوز علي شوية هارد رووك
هاهرب من حاتم فهمي و اخواته
خلاص يا حمكشة
قررت اعمل بحث عن صنع الله
و تأثيره في كل من قرأ له
هاشغل وقتي
هاروح للطنبورة يوم الاربع
و هاروح سانت كاترين في اي وقت
هارجع فرد تاني
و طزززززززززززززفي اي حاجة
اللي عايز يتفرج يتفرج
بكرة يعرفوا قيمة القرود

13 Comments:

Blogger Lone Wolf said...

طب والمم؟؟؟

2:56 PM  
Blogger عمرو غربية said...

كنت أهنئ حمكشة منذ ساعات على انضمامه مؤخرا للأحرار. الناس بيموتوا من قلة الرحمة، مش من الجوع. استقيلوا يرحمكم الله.

ألست أنت ممنوخ، شيطان آن رايس! ادع الناس للالتحاق بك خدمة للرب.

3:26 PM  
Blogger المليجي said...

وبعدين
أجمل حاجة في كل اللي ناوي تعمله انه بيتعمل تحت بند الترفيه
مفيش مانع ان الترفيه ده يتحول لنمط حياة اذا كان النظام أساسه واذا كانت مخرجاته المادية مشجعة

عاوز أعرف انت حاطط الكلام ده في بالك وللا لأ

11:42 PM  
Blogger أحمد said...

يعنى انتم سبتم حمكشة يلعب في دماغ الواد .. و جاين دلوقت تحاسبوه
منك لله يا حموكشة

6:15 AM  
Blogger Hamuksha said...

أنا ماليش دعوة بالواد دا.
طبعا أنا مش قاعد من غير ما يبقى فيه مم، باشتغل حر، هتقولولي مفيش أمان هاقول لكم يعني الشغل الثابت أمان؟ مش عايز اصدعكم بتجربتي، وهي مش طويلة على أي حال، يمكن أنا اكتشفت الحقيقة بسرعة، بس أعتقد اني ما اتسرعتش، الواحد كان بيبيع عمره وياخد ملاليم. ما كنتش باقرا ولا اسافر ولا أي حاجة، شغل شغل شغل، فلس فلس فلس. بس فعلا فعلا لو انا واخد منحة تفرغ أو حد متبنيني، ** أم الشغل، أنا باحب الشغل بس مش باحب يبقى الغرض الأول منه الفلوس. فيه حاجات كتير ف الحياة واقعة من الواحد بسبب العبودية دي، يا عالم هاخلص منها خالص ولا لأ.

7:37 AM  
Blogger ممنوخ said...

لون ولف
محدش بيموت من الجوع
و بعدين انت عارف ان المرتب مش بيكفيني سجاير و مواصلات

صاحب الأشجار

الحمد لله الذي جعل في أمتنا من يعرف ممنوخ
من القلائل الذين لم يسألوني يعني ايه ممنوخ؟
نعم أنا هو
memnoch the devil


مهندس

كلامك منطقي الي حد بعيد
لكن بصراحة
مش فايق علشان افكر فيه

ابليس

أنا مش حاسس اني هاعمل حاجة خطيرة أوي كده لدرجة الحساب
علي فكرة أنا لو كنت مبسوط من أي زاوية في الشغل ده ماكنتش هافكر اسيبه

حمكشة
أيها الوغد علي طول كده ماليش دعوة بالواد ده

علي العموم أنا لسه باكتب الحيثيات

4:00 PM  
Blogger أحمد said...

شفت باعك الزاى
-:)

5:24 AM  
Blogger Shady Youssef said...

سلامو عليكو

بص يا عم سمير
"و لسوف يعطيك ربك في ترضى"
اعمل اللي يخليك راضي م الأخر و سيبك من اي كلام ليه علاقة بتفكير عميق و حسابات مجردة مالهاش علاقة بحياتك الي نفسك فيها..

اعقلها و توكل
و زي ما عمنا صاحب الأشجار قالك
"استقيلوا يرحمكم الله"


لونولف
المم ممكن يتجاب من اي حاجة و زي ما انت قلت قبل كده هاشتغل كاشير في محل كتغير راديكالي مقترح
ولا نسيت

5:04 PM  
Blogger Lone Wolf said...

عزيزي,رد عالسريع كدة,لان الشاشة بايظة و بكتب من سايبر,و ساعود الي التفاصيل لاحقا

الامر يتعلق بالقدرة علي الاستغناء,كم من الاشياء التي تعتبرها اساسية تستطيع الاستغناء عنها في سبيل التحرر من قيود العبودية في العمل

الامر الثاني,في حالة عدم قدرتك علي الامر الاول,هو تقبلك لان يساعدك ماديا شخص اخر

نقطة اخيرة:برجاء الفصل بين التفاصيل التي تناقش في الاماكن الخاصة و بين الامور العامة التي تناقش في فضاء مفتوح

3:19 PM  
Blogger ألِف said...

أنا قلت من زمان: "استقيلوا يرحمكم الله"

6:08 AM  
Blogger The secret said...

برضه: طب والمم


يعني إيه محدش بيموت من الجوع؟ لا وحياتك في ناس بتموت من الجوع


وكمان من قلة الرحمة زي ما قال صاحب الأشجار


الحل؟ مش عارف بصراحة لأن أبويا بيدين مصروفي أول كل أسبوع
بس هو اختار قلة الرحمة أصله

12:02 AM  
Blogger Hamuksha said...

يعني ولا جيت ولا حاجة.
(ما تجيش على فكرة انا مش هنا)

3:09 AM  
Blogger sharks said...

مدونة الربح , مدونة ربحية مميزة , مدونة ارباح , Earn from your site , مدونة جوجل ادسنس , شركات ربحية , Blog Profit , مدونة شاملة للربح , اربح دولارات من الانترنت , اربح مع جوجل ادسنس , google adsense , مدونة الشركات الربحية , اكسب دولارات من الانترنت , profit blog مدونة الربح , مدونة جوجل ادسنس

مدونة الشلة , شات الشلة , مدونة بنات كول , a blog to make money from the internet, Forex Blog,Blog earnings, Earn money from your blog , مدونة الشلة , مدونة الربح من الانترنت ,مدونة جوجل ادسنس , مدونة الربح

2:53 AM  

Post a Comment

<< Home